തിരുവനന്തപുരം:  ഗവ മെഡിക്കൽ കോളേജ് ട്രാൻസ്ഫ്യൂഷൻ മെഡിസിൻ വിഭാഗം ലോക രക്തദാന ദിനാചരണം നടത്തി. ട്രാൻസ്ഫ്യൂഷൻ മെഡിസിൻ വിഭാഗം മേധാവി ഡോ ശശികല പരിപാടി ഉദ്ഘാടനം ചെയ്തു. ജീറിയാട്രിക് മെഡിസിൻ വിഭാഗം മേധാവി ഡോ ശ്രീനാഥ് മുഖ്യപ്രഭാഷണം നടത്തി. ലോകാരോഗ്യ സംഘടനയുടെ ആഹ്വാനപ്രകാരം എല്ലാ വർഷവും ജൂൺ 14 ന്  രക്തദാന ദിനമായി ആചരിക്കുന്നതിൻ്റെ ഭാഗമായാണ് ചടങ്ങ് സംഘടിപ്പിച്ചത്. സുരക്ഷിതമായ രക്തദാനത്തെക്കുറിച്ചും രക്ത ഘടകങ്ങളെക്കുറിച്ചും അവബോധം സൃഷ്ടിക്കുവാനും രക്തദാനത്തിന്റെ മാഹാത്മ്യത്തെപ്പറ്റി ജനങ്ങളെ ബോധവൽക്കരിക്കുവാനും നടത്തിയ ചടങ്ങിൽ രക്തദാതാക്കളെ ആദരിക്കുകയും ചെയ്തു. ജില്ലയിലെ ഐ ഐ എസ് ഇ ആർ , ഡിവൈ എഫ് ഐ, എ ഐ വൈ എഫ്, മോഹൻലാൽ ഫാൻസ് അസോസിയേഷൻ എന്നീ സംഘടനകളെ ആദരിച്ചു. അപൂർവ്വ രക്തമായ ബോംബെ രക്ത ഗ്രൂപ്പുള്ള ദാതാവ് ഹരിക്കുട്ടനെയും മറ്റു രക്തദാതാക്കളായ ഡോ ചാൾസ്, ശരത് എന്നിവരെയും ചടങ്ങിൽ ആദരിച്ചു. \'രക്തം ദാനം ചെയ്യൂ പ്രത്യാശ നൽകൂ ഇവയിലൂടെ ജീവൻ രക്ഷിക്കൂ\' എന്ന ഈ വർഷത്തെ പ്രമേയത്തെ പറ്റിയുള്ള ക്ലാസുകളും സംഘടിപ്പിച്ചു. ഡോ ദൃശ്യ, ഡോ ഷിഫി, ഡോ പൂർണിമ, ഡോ ഷാനവാസ്, ഡോ ശ്രീലക്ഷ്മി, ഡോ ദേവിക എന്നിവർ ചടങ്ങിൽ സംബന്ധിച്ചു.
ചിത്രം: ഗവ മെഡിക്കൽ കോളേജ് ട്രാൻസ്ഫ്യൂഷൻ മെഡിസിൻ വിഭാഗം മേധാവി ഡോ ശശികല ലോക രക്തദാന ദിനാചരണം ഉദ്ഘാടനം ചെയ്യുന്നു

തിരുവനന്തപുരം മെഡിക്കൽ കോളേജിലെ ആദ്യ ബി എസ് സി ഡയാലിസിസ് ടെക്നോളജി കോഴ്സ് പൂർത്തിയാക്കിയ 15 വിദ്യാർത്ഥികളുടെ ബിരുദദാനച്ചടങ്ങ് ഞായറാഴ്ച നടന്നു. സോഷ്യൽ ജസ്റ്റിസ് ആൻ്റ് കേരളാ സോഷ്യൽ സെക്യൂരിറ്റി മിഷൻ ഡയറക്ടർ 
 ഡോ അരുൺ എസ് നായർ ഐ എ എസ് പരിപാടി ഉദ്ഘാടനം ചെയ്തു. 
വൃക്കരോഗ ചികിത്സയിൽ ഏറ്റവും പ്രാധാന്യമേറിയ ഒരു ചികിത്സാരീതിയാണ് ഡയാലിസിസ്. രോഗികളുടെ ആരോഗ്യം മെച്ചപ്പെടുത്താനും ആയുർ ദൈർഘ്യം വർധിപ്പിക്കുന്നതിനും ഈ ചികിത്സയിലൂടെ കഴിയുന്നു.  ബി എസ് സി ഡയാലിസിസ് ടെക്നോളജി കോഴ്സ് പൂർത്തിയാക്കിയ 
 ഈ വിദ്യാർത്ഥികളിലൂടെ  കൂടുതൽ മികവുറ്റ രീതിയിൽ രോഗീപരിചരണത്തിനും സുഗമമായ ചികിത്സ  ഉറപ്പുവരുത്തുന്നതിനും സാധിക്കും. തിരുവനന്തപുരം മെഡിക്കൽ കോളേജിൽ 2020-ൽ ആരംഭിച്ച ആദ്യ ബി എസ് സി ഡയാലിസിസ് ടെക്നീഷ്യൻ കോഴ്സിൻ്റെ ബിരുദദാനച്ചടങ്ങാണ് ഇപ്പോൾ നടന്നത്. കോഴ്സിൻ്റെ പ്രാധാന്യം മുന്നിൽക്കണ്ട് സംസ്ഥാന സർക്കാർ തിരുവനന്തപുരം മെഡിക്കൽ കോളേജിലും കോഴ്സ് ആരംഭിക്കുകയായിരുന്നു.
നെഫ്രോളജി വിഭാഗം മേധാവി ഡോ മോഹൻദാസ്, മുൻവകുപ്പുമേധാവി ഡോ ജേക്കബ് ജോർജ്, ഫിസിയോളജി വിഭാഗം അസി. പ്രൊഫസർ ഡോ ദേവിക, നെഫ്രോളജി വിഭാഗം അസി. പ്രൊഫസർ ഡോ അരവിന്ദ് എന്നിവർ സംസാരിച്ചു. മെഡിക്കൽ കോളേജ് ആശുപത്രി സൂപ്രണ്ട് ഡോ ബി എസ് സുനിൽകുമാർ പ്രതിജ്ഞ ചൊല്ലിക്കൊടുത്തു.
ചിത്രം : മെഡിക്കൽ കോളേജിലെ ആദ്യ ബി എസ് സി ഡയാലിസിസ് ടെക്നോളജി കോഴ്സ് പൂർത്തിയാക്കിയ 15 വിദ്യാർത്ഥികൾ ബിരുദദാനച്ചടങ്ങിൽ അധ്യാപകർക്കൊപ്പം